super!
| Świętochłowice - Forum bez polityki https://hanysy.info/ |
|
| Forszus, geltak i politykery... https://hanysy.info/viewtopic.php?f=17&t=130 |
Strona 1 z 1 |
| Autor: | Ojgyn z Pnioków [ 15 sty 2014, 9:29 ] |
| Tytuł: | Forszus, geltak i politykery... |
Idzie to tyż posuchać na www.ojgyn.blog.onet.pl Boczycie jak ci to bóło kiejsik za tyj łoszkliwyj „kómuny”? Wszyjskie hajery, berkmóny, szmelcyrze, walcyrze i fto tam jesce jaki fach miôł, zawdy we łostatnigo dostôwali zawdank, znacy sie forszus (a po polskimu zaliczka) a piytnôstego geltak. To jesce bóło wtynczôs, kiej nóm tyn iglok „srogi Ed” snochwiôł, co to my sóm na isto już dziesióntô (pamiyntôcie?) „potęga” gospodarczô we świycie. Niyskorzij ci to wszyjsko praskło, zbulóło sie i terôzki mocka ludzi samtukej erbnie abo jakiesik sparcie (ónterszticóng) lebo „świadczynie przedemerytalne”; kôżdy snôs terôzki jes skuplowany ze ZUS-ym lebo inkszym MOPS-ym, abo sznupie po hasiokach. Za staryj Polski tyż bóła mocka elwrów ale tela, co ci jes jich terôzki, to by żôdyn planeciôrz niy poradziół wypokopić. Bo dôwnij, to ci ło tych niyftorych elwrach to i wice łozprawiali: Kiejsik deptôł taki elwer, bezrobotny ze synkiym kole srogij hali targowyj we Chorzowie i tak mu gôdôł: – Wiysz! Kiej już ustanymy te wóngle na hółdzie zbiyrać, kiej ino jakosik robota erbnymy, to zarôzki sie jakigosik kormika, jakosik świnia lajstnymy. Niyskorzij zaszlachtujymy, narobiymy krupnioków, żymloków, preswusztu, i pojymy sie aże nóm sie festelnie chepnie! – Tatulku, tatulku! A jak to bydymy ćkać? Ino same krupnioki i preswuszrty? Łojciec chlast tego synka bez pysk i rzóńdzi: – Ty giździe! Chleba sie weź, a niy ino same krupnioki i preswuszty! To dôwnij, a sam terôzki naobkoło ciyngiym idzie ujzdrzić, jak to roztomajte politykiery, jejich utrzidupskie chabióm dlô sia côłkie milijółny. Jedna „afera” majtô za drugóm a żôdnych za to niy idzie do heresztu wrajzić. Ale, dalszij niy byda jamrowoł, bo to juzaś polityka. A polityka – jak pedziôł jedyn móndrok Carlos Fuentes – to jes taki srogi knif społyknińciô rapitółzy (żaby) ze kamiyniannóm fresóm. I tak ci sie miarkuja, co tyn Carlos Fuentes blank ci niy znôł samtyjszych politykerów. Przeca już terôzki chnet wszyjsko mómy gynał popśnióne do kupy ze sużbóm zdrowiô. Jedne ino sam u nôs festelnie sztramsko fónguje. To te wszyjkie zuper-, hiper-, i jak je tam jesce mianować – markety. Niy byda rzóndziół łó nich nic złygo, bo kiej zrychtowali tyn srogi market we Piôśnikach, moja Elza pedziała, co sie tam pójńdymy, bo sie musi dlô sia nowe canbyrsty do zymboli lajstnóńć. Wlazujymy rajn, kukómy, a sam we fachach, we tych gysztelach jes jich cheba ze dziesiyńć tysiyncy, abo i wiyncyj. – Kuknij ino Elza, przeca u nôs na côłkich Pniokach ani półowa z tego niy mô zymbisków !!! Nale, tak by tak jô chocia dobry gyszeft na tym zrobiół... lajstnółech sie dwa gryfne wózki za... śtyry złote. A bydóm nóm te politykery snochwiać i snochwiać; deczko ustali bez świynta, ale już sie łozfechtowali. Niyftorzi gynał jak we takij powiarce: „Kiej my sie zbierymy w kupa, pokôżymy światu ...” Wiycie przeca co, pra? A kiej już tak fandzolóm, to idzie spómnieć szałszpilera Groucho Marxa, kiery miyniół tak: „Niy miarkuja, jakim tyż to prezidyntym (prymierym, posłym) tyn istny bydzie, bo łón ino gôdô, gôdô, gôdô... pewnikiym ale bółby dobróm ...żónóm”. Ha, ha, a jô gawca w telewizyjô i słysza, co policajt dziylnicowy gôdô, iże niy do zwóli, coby go ftosik łobejzdrzôł jako mô fresa, bo po robocie to łón już niy ma policajt, ino priwatnô perzółna jak choby jô, Ojgyn. Srô w galoty ze strachu? Niy to ci jes jejigo „prywatność”. A jô bocza ino jedne. Za bajtla, za karlusa, kiej bez dróga szôł mój dziylnicowy, to my srali do galot i byli mónter, i żôdyn niy wyrobiôł. A terôzki, kiej widza takich trzech„szwejków”, kierzy deptajóm po Krojcce (ale ino we połednie), to bali i nasze bajtle ze łochrónki sie śnich do łozpuku chichrajóm. Nale tak sie miarkuja, co styknie – podwiyl co – tego jamrowaniô, bo to jes tak by tak psinco we wercie. A Wiycie? Skuli jednego sie sam werci we Polsce żyć. Anó, to ino beztóż, iże kiej cowiek świtnie to... mu blank niy ma ŻÔL! |
|
| Autor: | serena [ 15 sty 2014, 11:25 ] |
| Tytuł: | Re: Forszus, geltak i politykery... |
| super!
|
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|