| Świętochłowice - Forum bez polityki https://hanysy.info/ |
|
| Modziokowe tańcowanie... https://hanysy.info/viewtopic.php?f=17&t=203 |
Strona 1 z 1 |
| Autor: | Ojgyn z Pnioków [ 09 mar 2014, 9:55 ] |
| Tytuł: | Modziokowe tańcowanie... |
Idzie to tyż posuchać na www.ojgyn.blog.onet.pl Nó, tóż mómy już richtik szlus ze karnewalym, szlus ze tańcowaniym, szlus ze faszingowymi uciechóma. Ale pogôdać ło tańcowaniu... mogymy. Słówa tych terôzki modernych śpiywek „rapowych” prosto do łócz gôdajóm ło „zeksie” a dzisiejsze modzioki tańcujóm pôrami, trzikóntami abo i srogszymi hormijóma. I łociyrajóm sie ło sia – festelnie procnie jes łopisać jejich ruchy tak, coby mógli to przeczytać abo posuchać dziecka. Pedzieć to dylikatnie, idzie sam przeca ło mocka wiyncyj niźli ło kryncynie łogibami. Niy ma przeca żôdnych dowodów na to, iże przytulanie sie przi tańcowaniu wiydzie do swadźbiynia, do pôrzynia sie. Ale szłoby sie sam jich spytać, co tyż tak te mode ludzie kcóm naprôwda zamanifestiyrówać, pokôzać na zolu. Iże sóm fertik na zeks? Iże sóm fiks ónd fertik na zeks ze tym razinku karlusym abo dziołchóm, i kcóm ci to wszyjskim naobkoło łogłôszać? Łodpedzóm łóni pewnikiym, co łociyranie sie ło sia przi tańcowaniu nic przeca niy gelduje, niy mô znaczyniô. Blank ajnfach tak sie terôzki dzisiej tańciyruje. Tukej ale jakisik dociyrny łojciec mógby sie spytać: eźli to jes prôwda, to jak mô wyglóndać przyjńście łod tych nic niywercitych, chocia festnie zeksualnych ruchów na zolu do czegosik, co już ci bydzie geldowało? Ło czym wy ze sia łozprôwiôcie, kiej milknie muzyka? Jakich tyż to słówecek używôcie, coby przeniyś to, co wôs kupluje na wyższyjszy pozióm? Procnie nóm zwiykowanym zadôwać take pytania, bo tańcowanie dzisiyjszych łojców we jejich szkolnych latach, blank niy przipóminali popisów tego Freda Astaire’a i Ginger Rogers. Szlagry ze lôt 60. i 70., jak na tyn przikłôd twista, tańcowało sie przeca blank przedsiã. Partnyra we côłkości niy bóło potrza. Dziołchy fajniście dôwali se radã, a karlusy ze obawy, iże przi sprawówaniu tanycznych ruchów, bydóm podane na idijółtów, woleli podpiyrać ściany we tancbudach. Spółczysne przitulanki-macanki przinôjmnij zwôbiajóm na zol łobie płcie. Jak to pedziôł kiejsik jedyn ze modych tancyrzy: chopcy majóm rade tańcować, a dziołchy juzaś majóm rade... zeks. Tela, co niy lza sie do tego prziznôwać. Taki „erótyczny” taniec dozwôlô szafnóńć i jedne, i druge, co wszyjskim jim to sie na isto festelnie zdô. A mie sie widzi, co tak po prôwdzie trza by możno wszyjskich modzioków (tak na napoczniyńcie dziołchy) nauczyć porzómnie tańcować, podwiyl sóm jesce mode. A za tymi dziołchóma – jak to zawdy jes na chnet côłkim świycie – pójńdóm mode chopcy, sztramske karlusy. Jô miarkuuja, iże niy muszóm sie zarôzki naumieć tanga abo waloszka, chocia poznanie chocia ino gróntnych kroków inkszych zortów tańcowaniô pewnikiym jim wszyjskim niy zaszkłódzi. A móżliwóści jes ci przeca mocka. We świycie, we niyftorych szkołach już na wiesna (u nôs jesce niy, bo przeca nasze szule, nasze rechtory i rechtórki uczyć muszóm dziecka i modzioków ino ło powstaniach, ło szczwôrtyj... dziesióntyj RP i możno nôjważniyjsze – katyjmusu), skorzij balu maturalnygo poświyncô sie lekcyje wychowaniô fizycznygo na nauka na tyn przikłôd swinga i inkszych jesce zortów tańcowaniô, kiere gynał sztimujóm ze rytmym tych modernych „hiphopowych” szlagrów. Bezmać i tam (u tych ci Ynglynderów abo Hamerikónów) te szkolorze nôjprzodzij jamrowali i wajali, ale nałónczôs „balu maturalnego” próbowali tego wszyjskigo, co sie naumieli, chocia jakóż by inakszij, niy wyrzykli sie blank do łostatka „erótycznych” wygibasów. Ale jak kiejsik tuplikowała mi jedna dziołcha, tako myjdla i festelno r-zula: – Inksze zorty tańcowaniô niy sprôwiajóm nóm żôdnyj frojńdy. Jô, i moje przociele tańcujymy łociyrajónc sie ło sia, i ino poniykedy medikuja, eli to tak razinku kciała bych tańcować na włôsnym wiesieli. Znacy, możno niy wszyjsko jesce u tych modzioków stracóne! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|