Świętochłowice - Forum bez polityki

Apolityczne forum miłośników historii i kultury Śląska i Świętochłowic
Dzisiaj jest 28 mar 2024, 14:00

Strefa czasowa UTC+1godz.




Nowy temat Odpowiedz w temacie  [ Posty: 1 ] 
Autor Wiadomość
Post: 06 sty 2016, 9:19 
Offline
Użytkownik
Użytkownik

Rejestracja: 17 gru 2013, 8:32
Posty: 281
Idzie to tyż posuchać na www.ojgyn.blog.onet.pl

Jak ci to mōm we zwyku, wczas ło szaroku, znaczy sie wele połednia pyndaluja do Breka na laga piwa, coby tyż przi nij połozprawiać ze kamratōma. Wczorej spichnōłech sie ze jednym ze moich modszych kamratōw, ze Jorgym łod Sznapcynyj. Bōł ci łōn jakisik jankorny, zachmulōny... nō, blank niyrichtik. Łobsztalowŏłech po zajdlu biyru i czekōm aże łōn sie łozwie. Po kilku szlukach piwa napocznōł:
– Wiysz Ojgyn, mōm utropa, łogrōmnucnŏ turbacyjŏ...
– A cōż tyż to sie stanōło? – pytōm sie opaternie.
– Anō, wiysz, to bōło tak. Pŏra tydni tymu nazŏd jedna moja kamratka ze roboty pokwolōła sie, co jeji apsztyfikant, ze kerym sie tam swadźbi na boku, dŏł łōnyj goldowy anhynger na kecie, taki szykownisty halsband....
– Nō, a co to mŏ do kupy ze cia? – spytŏłech wrazicko.
– Nō, tōż suchej. Łōna sie nŏs kamratōw spytała, co mŏ łodpedzieć swojimu chopeczkowi (bo tyn absztyfikant to bōł dlŏ nij ino na przidŏwek), kej tyn spytŏ skany łōna wziyna tyn „wisiorek”.
– Nō i....– spytŏłech jesce barzij interesantny.
– Napoczli kamraty ciepać roztomajte dorady... co jedna to barzij iptowatŏ...
– Nŏ, jak zawdy przi takij przileżitōści...
– Ja, ja... i wtynczŏs jŏch sie łozwŏł: A niy mogesz dziołcha, na tyn przikłŏd, pedzieć, iżeś go kajsik wele chałpy znŏdła?
– Naleś to wypokopiōł. – pedziŏłech ze lachaniym.
– Ojgyn! Przecamć to sie ludziōm przitrefiŏ, prŏwda?
– Anō, moge sie przitrefić, moge, nale jŏ bych w to blank niy uwiyrzōł Jorg.
– Ale jŏch pedziŏł kamratōm, iże łōńskigo roka moja starŏ znŏdła armband, takŏ goldowŏ branzōlytka na plantach wele naszego knapszaftu.... I blank ci niy miarkuja po jakymu cŏłke nasze biōro do terŏzka sie symie chichrŏ...

_________________
Ojgyn z Pnioków


Na górę
 Wyświetl profil  
 
Wyświetl posty nie starsze niż:  Sortuj wg  
Nowy temat Odpowiedz w temacie  [ Posty: 1 ] 

Strefa czasowa UTC+1godz.


Kto jest online

Użytkownicy przeglądający to forum: Obecnie na forum nie ma żadnego zarejestrowanego użytkownika i 5 gości


Nie możesz tworzyć nowych tematów
Nie możesz odpowiadać w tematach
Nie możesz zmieniać swoich postów
Nie możesz usuwać swoich postów
Nie możesz dodawać załączników

Szukaj:
Przejdź do:  
cron
Technologię dostarcza phpBB® Forum Software © phpBB Group