| Świętochłowice - Forum bez polityki https://hanysy.info/ |
|
| Niych i tak bydzie... https://hanysy.info/viewtopic.php?f=17&t=628 |
Strona 1 z 1 |
| Autor: | Ojgyn z Pnioków [ 13 sty 2016, 10:00 ] |
| Tytuł: | Niych i tak bydzie... |
Idzie to tyż posuchać na www.ojgyn.blog.onet.pl Je ci to łozprŏwka ło farmerze, ftorymu pitnōł kōń. Tego wiyczora nawiydziōła ci go czelodka sōmsiŏdōw, coby mu łoznōjmić polutōnek, spōłczucie skuli tego, iże bōł ci to dlō niygo na isto srogachny pech. Tyn farmer łōnym rzyknōł: – Nō, niych i tak bydzie. Na drugi dziyń tyn jejigo kōń wrōciōł nazŏd a jesce ku tymu prziwiōd ze sia do kupy szejś dzikich kōni. Sōmsiŏdy juzaś ku niymu, ale terŏzki beztōż coby fajrować szczysny łobrōt tego cufalu. – Niych i tak bydzie. – łodpedziŏł łōnym juzaś tyn farmer. Kolyjnego dnioszka synek tego farmera prōbowŏł deknōńć zatelym, łosiōdłać jednego ze tych dzikich kōni. Tak ci niyszczyśnie śleciŏł ze tego kōnia i złōmŏł se gyra. Sōmsiŏdy juzaś sie ku tymu farmerowi przikulwitali, coby mu spōłczuć, a łōn – jak to miŏł we zwyku – łodpedziŏł: – Niych i tak bydzie. Na drugi dziyń po tym cufalu, łoficyjery poborowe prziszli do tyj wsi, coby zebrać modych ludzi do armiji. Jednakowōż skuli tego, co tyn synek farmera miŏł złōmanŏ szłapa, niy wziyni ci go na stŏwka. Kej sie sōmsiŏdy ło tym dowiydzieli prziszli juzaś ku tymu farmerowi, coby sie śniym do kupy radować. Tyn łōnym juzaś pedziŏł ze chichraniym: – Niych i tak bydzie! I dzicie, moje wy roztomiyłe suchŏcze, jak czynsto niy mogymy dōjńść do sia po niyszczysnym cufalu, po popśniōnych zolytach, po blank gupim falu. Ło wiela lekszij bōło by ci nōm, kej poradziylibychmy przikwŏlić to, co sie nōm we życiu przitrefiōło ze słōweckōma: – Niych i tak bydzie! Wyciōngnōńć |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|