Świętochłowice - Forum bez polityki

Apolityczne forum miłośników historii i kultury Śląska i Świętochłowic
Dzisiaj jest 28 mar 2024, 17:51

Strefa czasowa UTC+1godz.




Nowy temat Odpowiedz w temacie  [ Posty: 1 ] 
Autor Wiadomość
Post: 24 sty 2016, 9:04 
Offline
Użytkownik
Użytkownik

Rejestracja: 17 gru 2013, 8:32
Posty: 281
Idzie to tyż posuchać na www.ojgyn.blog.onet.pl

Nō, tōż mōmy za jakisik tydziyń szlus ze tym piyrszym latośnym miesiōncym, bydymy mieli za tydziyń szlus, fajrant ze styczniym. A je ci to tak we cŏłkości karnewalowy miesiōnc, we ftorym jŏ kejsik, jesce niy tak dŏwno tymu nazŏd, niy przepasowŏłech żŏdnyj przileżitōści, coby wyciōngnōńć kajsik na balanga, na srogachny hajdamasz i bōms, na gryfnŏ tańcowaczka. Terŏzki to mi sie już – ganc ajnfach – niy kce, bo wiela to lŏt idzie tańcować ino ze włōśnōm... babōm? Beztōż tyż terŏzki łoznŏjmia taki paradny manifyst, takŏ wyzwa majoryntnego czowieka, znaczy sie... chopa. Dejcie pozōr, bo bydzie to dlŏ wszyjskich richtik poczysne i słōszne!
Bydzie to na isto wyzwa zdrzałego czowieka, chocia niykōniycznie pynzjōnisty. Wiycie! Świat, moje Wy roztomiyłe modzioki, kejsik ci wyglōndŏł blank, ale to blank inakszij. Niy cuciōła nŏs, terŏźnich szejśdziesiyciolŏtkōw lebo tych ci już siedymdziesiyńciolŏtkōw jakosik tam telewizyjŏ śniŏdaniowŏ, i beztōż tyż niy wiedzielichmy nic ło istniyniu spaśnych cwergowatych akrōbatkōw, jakichsik chippendalesōw (takich, wiycie, chopskich sztriptizyrōw) i roztomajtych kotōw, miauczkōw, kere poradzōm gŏdać alfabytym Braille'a. Cuciōł nŏs ruski weker, ruski buksiok, kery blank niy kciŏł fóngować tak, jak tyn hejnŏł ze marijackij wiyży kŏzŏł. Ale jednakowōż poradziyli my sie zwyrtnōńć i być zawdy na czas we szuli. Na śniŏdanie ćkalichmy klapsznity ze lyjberwusztym, bez świynta ze szinkōm, ftorŏ gerowała już po dwiōch dniach. Kyjzy byli, eźli na isto byli, ino dwie: żōłtŏ i biŏłŏ. Miana łōnych byli jednako umōłwne, lipne jak łōnych wert i farba. Żŏdyn tyż niy jŏdŏł jakichsik „lunchōw” – byli ino druge śniŏdania, take klapsznity gynał, akuratnie zapakōwane bez nasze mamulki we taki papiōr – ze miana – śniŏdaniowy, ftory poddŏwali niyskorzij dōmowymu „recyklingowi”, i eźli sie niy umarasiōł, wykorzystŏwało sie go drugi, abo i trzeci rōłz.
Jŏdało sie tyż łobiady: kartofle, tuste zōłzy, kotlety; mało ku tymu bōło rybōw i gymizōw. Na nudle gŏdalichmu nudle a niy „pasta”, bo italijōńsko „pasta” to naszŏ śmiyra, bo tōm śmiyrōm glancowalichmy wszyjske szczewiki. Żŏdyn tyż ajnfachowy czowiek niy miarkowŏł, co to jes tyn diosecki choresterol i ćkŏł tela jajec, wiela ino poradziōł. A jednakowōż niy umiyralichmy masowo na żŏdne ci tam hercszlagi. Bōł taki czŏs, kej roztomajte klugszajsry tuplikowali, co tōmaty sōm „rakotwōrcze” a zatym niyskorzi inksze ze słōsznōściōm eklerowali, iże to blank, ale to blank niy ma prŏwda.
Rechtōr juzaś, kery poradziōł fest przimaścić linijŏrzym abo połōmać skaźnik na niyjednyj dupie, kŏzŏł nōm uczyć sie mocki roztomajtych definicyji i wzorōw, i straszōł ci nŏs powtŏrzaniym na bezrok klasy, niy tuplikowŏł tyż, co łostanymy siedzieć. Jednakowōż niy mielichmy skuli tego żŏdnyj „traumy”. Tak prŏwdōm blank niy miarkowalichmy tego łoszkliwego słōwecka ani tyż niy bylichmy pod flyjgōm jakigosik – modernego terŏzki – „terapeuty”.
Niy uczylichmy sie ynglickigo i niy deptali my na tyn moderny terŏzki balyt. Coby ugŏdać sie ze kamratōma na fusbalszpil, niy glingalichmy skorzij dō nich ino wkarowalichmy po łōnych do pomiyszkaniŏ, abo wrzescelichmy pod jejich łoknami, coby wylazowali na plac. Niy brōniōł nōm tego żŏdyn ipta ze jakigosik TVN Style abo inksze angyjbery.
We łōnych czasach szajspapiōr bōł ino we lyjberwuszcie i mortadeli, a pulwer do praniŏ prŏł gynał i biŏłe i farbiste lōnty. Eźli razinku... prŏł. Niy bōło ci tyż tych kryjmōw na dziyń, na noc, na zima i na lato, na lewe lico i na prawe. Bōła ino ta nivea. Jednakowōż niy capiylichmy ani niy umiyrali my na dezynteriŏ, znaczy sie na jakosik laksyra.
Bylichmy blank niymōłdnie prziłobleczyni ale udŏwało nōm sie ugŏdać ze dziołchami, kere – i niy kca sam żŏdnyj cosik przeciepować – blank tyż niy miarkowali fto to jes ta cŏłkŏ Jaga Hupało, jakosik Horodyńskŏ, Jacykow abo inksze wywołane „stylisty”. >>>>
Nasze łojce niy glingali dō nŏs ze mobilniokym i nigdy tyż niy wiedzieli, blank niy miarkowali kaj my sōm. Niy łodwojziyli tyż nŏs autokōma do szuli, łod kedy pizło nōm siedym lŏt, i jakimsik cudym niy kipli, niy umrzili łōni na syrce, a my niy bylichmy łofiarōma pedofilōw ani zeryjnych mordyrzōw, a na blank licho łoznakowanych cestach, na przyjńściach dlŏ piechciŏrzy, niy łozjechali ci nŏs autoki. A przecamć jakesik ci tam wtynczŏs tyż autoki fyrtali.
Nō, i niy knipsowalichmy sie do Naszyj Klasy, ani na tyn Face Book spode tego wywołanego rzymskigo Koloseum ani spode piramidōw, abo wiyży Eifla. Jejździylichmy za to na roztomajte kolōnie i obozy, ściepowalichmy sie na orynżada we bojtliku, abo brauza we pulwrze i łodpustowe kyjksy. Nō i na zicher niy miarkowali my, co to jes tyn stopierōński „Taniec ze gwiŏzdami”, fto to jes Tusk, Kaczyński, Komorowski i Duda ze Szydłym, co tyż to za diosectwo jes ta „emancypacja kobiyt” i jakesik ci tam „prawa gadziny”. My, już terŏzki siedymdziesiyńciolŏtki przeżylichmy tyż richticzne piekło. I skuli tego, żōndōm, żōndōm, na isto nastowōm na to, coby dlō nŏs wszyjskich bōła pynzyjŏ... drugij grupy!

_________________
Ojgyn z Pnioków


Na górę
 Wyświetl profil  
 
Wyświetl posty nie starsze niż:  Sortuj wg  
Nowy temat Odpowiedz w temacie  [ Posty: 1 ] 

Strefa czasowa UTC+1godz.


Kto jest online

Użytkownicy przeglądający to forum: Obecnie na forum nie ma żadnego zarejestrowanego użytkownika i 9 gości


Nie możesz tworzyć nowych tematów
Nie możesz odpowiadać w tematach
Nie możesz zmieniać swoich postów
Nie możesz usuwać swoich postów
Nie możesz dodawać załączników

Szukaj:
Przejdź do:  
cron
Technologię dostarcza phpBB® Forum Software © phpBB Group