Świętochłowice - Forum bez polityki
https://hanysy.info/

Modym jużeś chopie bół...
https://hanysy.info/viewtopic.php?f=17&t=646
Strona 1 z 1

Autor:  Ojgyn z Pnioków [ 28 lut 2016, 9:41 ]
Tytuł:  Modym jużeś chopie bół...

Idzie to tyż posuchać na www.ojgyn.blog.onet.pl

Nō, bydzie to ło takim ci strzydnim wiyku (chopskich latach) we tym naszym żywobyciu. Jak ci jesce czowiek je śpikolym, blank ci go niy łobłajzi czŏs, kej bydzie musiŏł sie deczko pouwŏżać ło latach, ftore napoczynajōm tyn ci jejigo strzydni wiyk. A to ci sie na isto wartko ku nōm kludzi. Jesce czowiek sie niy wygramulōł ze powijŏkōw, jesce sie czowiekowi zdŏ, iże mŏ cŏłkŏ młōdość przed sia i cŏłkimi gōrzściami moge nabiyrać dnioszki ze tego srogigo kibla życiŏ, a sam już przikulwitali sie wartko... te lata, ło kerych terŏzki kciŏłbych poberać.
Eźli te twoji lata na tym nŏjgryfniyjszym ze światōw pokazywajōm sie ino we tym twojim basisku, twoja tajla (polskŏ talia) sie blank traci, to na isto znaczy, iże jeżeś już chopie we... strzydnim wiyku, dokulwitŏłeś sie do chopskich lŏt.
Jeżeś na zicher we strzydnim wiyku, kej jesce mŏsz festelnŏ szkrabka i pypeć na cosik, ale tak po prŏwdzie blank już niy pamiynŏsz... na co. Tak tyż je:
– Kej ci dochtōr zalycŏ ćwiczynia na frisznym lufcie, a ty ganc ajnfach wlazujesz do autoka i łotwiyrŏsz ino łokno.
– Kej napoczynŏsz gasić fōncla, nachtlampecka, kŏżdŏ mziczka we izbie ino skuli ajnfachowyj szporobliwōści a niy beztōż, coby przeżyć, zedrzić ci rōmanticzne kwile ze umiyłōwanōm łosobōm.
– Kej wieczerze przi świyckach ustowajōm być dlŏ cia rōmanticzne, bo niy poradzisz już blank przeczytać... szpajzykarty we szynku.
– Kej miasto sie uczŏsać, napoczynŏsz chopie ukłŏdać opaternie wosy, ftore ci jesce na palicy łostali.
Wiycie! Mode lata, to łokrys życiŏ we kerym śmigōmy afki i ciepiymy machy do zdrzadła ale za to strzydni wiyk, to czŏs kej te zdrzadło napoczynŏ nŏm ci poszklaby robić, podrzyźniać i festelnie za te mode lata poradzi ci sie te twoji zdrzadło łodpolić.
Jeżeś na zicher we strzydnim wiyku, kej Łojciec Czas napoczynŏ ci zebiyrać wszyjsko to, co ci szczodliwie dała Matka Nŏtura:
– Kej ty już ustŏwŏsz szacōwać i prziganiać staryj gyneracyji a napoczynŏsz już festelnie i ze złōściōm przisrŏwać modyj.
– Kej niy poradzisz już nikōmu dŏwać złygo przikładu ... ale mogesz posugować doradōm, dŏwać ino dobre rady a wszyjske przi tymu szczyrzōm sie i pukajōm ze śmiychu.
– Kej już na wszyjske pytania znŏsz richticzne łodpowiydzi (abo ci sie zdŏ, iże znŏsz) ale żŏdyn cie ło to już łō nie... prosi!
Wiycie! Sōm ci trzi take łokrysy we żywobyciu: dzieciynctwo, mode lata i... ”wyglōndŏsz chopie wyśmiynicie!”
Nō, tōż miarkujesz kamracie, chopie stopierōński, iżeś je już we tym strzydnim wiyku? Nic to, gowa do gōry! Nŏjgorszyjsze jesce... przed CIA!

Strona 1 z 1 Strefa czasowa UTC+1godz.
Powered by phpBB® Forum Software © phpBB Group
https://www.phpbb.com/