| Świętochłowice - Forum bez polityki https://hanysy.info/ |
|
| Brif... https://hanysy.info/viewtopic.php?f=17&t=679 |
Strona 1 z 1 |
| Autor: | Ojgyn z Pnioków [ 15 maja 2016, 8:05 ] |
| Tytuł: | Brif... |
Idzie to tyż posuchać na www.ojgyn.blog.onet.pl Pisza do Cia tych pŏra szkryfkōw, cobyś wiedziŏł, iże ku Cia pisza. Kej ty tyn brif dostaniesz, to bydzie znaczōło, iże łōn do Cia doszŏł. Jak go niy dostaniesz, dej mi znać, to go pośla jesce rōłz. Pisza do Cia blank polekutku, bo jŏ ci gynał miarkuja, iże Ty niy poradzisz wartko czytać. Niydŏwno fater przeczytŏł we jakimsik cajtōngu, iże nŏjwiyncyj niyszczysnych cufali przitrefiŏ sie ło jakisik kilomyjter łod włōśnyj chałpy, tōż tyż gibko wrōłz przekludziylichmy sie ździebko dalszij. Miyszkōmy terŏzki wszyjske we na isto szykownistyj chałpie. Je ci tu waszmaszina, chocia niy jeżech istŏ, eźli sie łōna niy popsowała. Wczoraj wciepłach rajn pranie, pociōngłach za sznōrek i pranie ci kajsik sie zapodziŏło. Nale, przecamć sie skuli tego niy łobiysza... Pogoda, launa niy ma u nŏs nŏjgorszyjszŏ. We łōńskim tydniu siōmpiōło ino ze dwa razy. Za piyrszōm razōm bez trzi dni, a za drugōm – bez śtyry dni. Co do jakli kerōm żeś kciŏł. Ujek Pyjkter pedziŏł, iże kej jŏ ci jōm pośla ze kneflami, to bydzie mocka kosztować, bo knefle sōm diosecko ciynżke. Beztōż tyż łoberwałach te knefle i wrajziōłach ci je do kabzy. Fater dostŏł yntlich robota. Je ci skuli tego hyrny jak pŏw, bo mŏ pod sia jakesik piyńćset ludzi... wysiywŏ trōłwa na kiyrchowie. Twoja szwestra, Julka, kerŏ sie już wydała na łostatku śległa, urodziōła. Niy miarkujymy jesce eźli to synek abo dziołszka, tōż tyż Ci niy rzykna eźliś je ujkym abo tantōm. Jak to bydzie dziołszka, to ta Twoja szwestra do łōnyj miano pō mie, nale bydzie to fest dziwoczne, coby gŏdać na swoja cera – mama. Gorzij je ze Twojim bracikym, Hanyskym. Zawar ci łōn auto i łostawiōł klucyki driny. Musiŏł pōjńść do dōm po drugi kōmplyt, coby nŏs wyciōngnōńć ze pojstrzodka autoka. Kej sie bydziesz widziŏł, kej sie spichniesz ze Gryjtōm, pozdrōw jōm łodymie, a eźli byś sie śniōm niy trefiōł, to łōnyj nic niy gŏdej. Twoja mamulka Zofija P.S. Kciałach ci do tego brifu wciepnōńć pŏra złociokōw, alech już na zicher zaklyjbowała kuwerta. |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|