Świętochłowice - Forum bez polityki

Apolityczne forum miłośników historii i kultury Śląska i Świętochłowic
Dzisiaj jest 29 mar 2024, 13:01

Strefa czasowa UTC+1godz.




Nowy temat Odpowiedz w temacie  [ Posty: 1 ] 
Autor Wiadomość
Post: 18 maja 2016, 8:06 
Offline
Użytkownik
Użytkownik

Rejestracja: 17 gru 2013, 8:32
Posty: 281
Idzie to tyż posuchać na www.ojgyn.blog.onet.pl

Wszyjskie sie już pomaluśku rychtujŏm do lata. Dijyty, coby z wŏgi ściepnōńć, jakesik moderne „masaże”, flyjgowanie sie we tym ichnim „solarium”... i take tam mecyje. I sam mi sie spōmniŏł taki fal:
Idzie kokot kole szynku a tam we szałfynstrze na roście łobrŏcŏ sie kurzica we tyj modernyj mikroweli. Gawcy tak tyn kokot, gawcy, pyndaluje tam a nazŏd i łorŏz gŏdŏ sōm do sia:
– Ja, ja, jakesik solaryjōm, ku tymu karasol a ze kim do pierōna jŏ ci mōm tyn cŏłki „sex” łōnaczyć?
To bōło te solarijōm a terŏzki cosik inkszego. Wiycie! Już łod napoczniyńciŏ wiesny mōmy we telewizyji, i to na wszyjskich kanalach, mocka ryklamōw, ftore namŏwiajōm nŏs do ściepowania ze wŏgi, do tego festelnie modernego łodchudzaniŏ. Nō, i niy ino baby chytajōm sie na te belakwastry, bo lecy kedy znŏjdzie sie i chop gupielok. Tak tyż bydzie we tym cufalu.
Glingŏ chop do fyrmy, kerŏ reklamiyruje ściepowanie ze wŏgi i po krōtkij gŏdce łobsztalowŏł se taki pakyt ło mianie „5 kilo bez piyńć dni.”
Na drugi dziyń zwōnek przi dźwiyrzach, przed niymi szykownistŏ blōndina, kajsik kole dwadzieścia lŏt starŏ, duge nogi, pŏłno piōntka (i to fedrujōncŏ), a na sia, krōm tunkōw i tabulki na karku, niy miała nic. Sagusiyńkŏ! Dziołcha przestawiōła sie, iże robi we fyrmie i tego pakytu „5 kilo bez 5 dni”.
A na tyj jeji tabulece taki napis:
„Mōm na miano Kaśka. Kej mie chycisz – byda twoja!”
Chop puściōł sie w te piynty za tōm blōndinōm, pogzuł ci za niōm choby szus. Po pŏruch kilomyjtrach i jakichsik ci szwerach i turbacyjach przi napoczniyńciu, na łostatek chyciōł ci ta swoja nadgroda. Zituacyjŏ powtŏrzŏ sie bez kolyjne śtyry dni. Chop wlazuje na wŏga i ze zadowolniyniym wymiarkowŏł, iże richtik ściep za basiska cŏłke piyńć kilo. Nō, tōż glingŏ juzaś do tyj fyrmy i tōm razōm łobsztalowŏł se pakyt – „10 kilo bez 5 dni”.
Na drugi dziyń ta samŏ lajera: we dźwiyrzach stowo jesce gryfniyjszŏ dziŏłcha, nŏjszykowniyjszŏ, nŏjbarzij zeksōwnŏ jakŏ widziŏł we życiu. I tak jak przodzij niy mŏ ci łōna na sia nic krōm tunkōw i tabulki na karku:
„Gŏdej mi Yjwa. Jak mie chycisz – byda do łostatka twoja!”
Ta ale frela mŏ jednakowōż kōndycyjŏ choby Ymil Zatopek, tak iże tymu chopowi niyletko, festelnie procnie je jōm chycić i ta cŏłkŏ gōnitwa, ścigani zetwała mocka dugszij. Na łostatku jednakowōż wykazuje sie, co nadgroda bōła we wercie tego nadludzkigo wysiyłku...
I juzaś ta samŏ lajera bez śtyry dni i po tym żyniyńciu chop stowo na wŏdze, blank zadowolniōny... ściep ze wŏgi łobiycane 10 kilo.
Nō, tōż terŏzki uzdŏł, iże pōjńdzie na cŏłkość i zwōni do fyrmy trzeci rōłz. Łobsztalowŏł se paket „25 kilo bez 5 dni.”
Baba, kerŏ łodebrała telefōłn pytŏ sie go ale:
– Sōmeście panoczku isty tego, pewny tego, coście łobsztalowali? To je nasz nŏjprocniyjszy, nŏjgorszyjszy prōgram!
– Ja, ja... tego razinku na isto kca, jeżech pewny, iże tego kca! Cŏłke lata niy czułech sie tak sztramsko jak terŏzki!
Na drugi dziyń zwōnek u dźwiyrzi. Przed niymi stoji srogi, zwality, musklaty dwametrowy chop, ftory mŏ na sia ino rōżowe tryjtki i tabulka:
„ Jeżech Franc. Jak jŏ cie chopie chyca – bydziesz MŌJ!”

_________________
Ojgyn z Pnioków


Na górę
 Wyświetl profil  
 
Wyświetl posty nie starsze niż:  Sortuj wg  
Nowy temat Odpowiedz w temacie  [ Posty: 1 ] 

Strefa czasowa UTC+1godz.


Kto jest online

Użytkownicy przeglądający to forum: Obecnie na forum nie ma żadnego zarejestrowanego użytkownika i 20 gości


Nie możesz tworzyć nowych tematów
Nie możesz odpowiadać w tematach
Nie możesz zmieniać swoich postów
Nie możesz usuwać swoich postów
Nie możesz dodawać załączników

Szukaj:
Przejdź do:  
cron
Technologię dostarcza phpBB® Forum Software © phpBB Group