| Świętochłowice - Forum bez polityki https://hanysy.info/ |
|
| Spomiarkowano przedowaczka.... https://hanysy.info/viewtopic.php?f=17&t=734 |
Strona 1 z 1 |
| Autor: | Ojgyn z Pnioków [ 14 sie 2016, 8:12 ] |
| Tytuł: | Spomiarkowano przedowaczka.... |
Idzie to tyz posuchać na www.ojgyn.blog.onet.pl Jedyn ze mojich przocieli mŏ szykownŏ chałpecka kajsik driny naszyj Puszczy Białowiyskij, znaczy take letnisko we dzikōści. Te łodludzie je festelnie farbiste, kōmsztowne, i na isto szykowne, prima zort na wywczasy ale... deczko możno zadupiaste, zaprane dechōma! Do nŏjbliższygo sklepu trza festelnie pyndalować naobkoło jyziōra bez trzi kilomyjtry. Wy tyj chałpeczce tego mojigo przociela zbajstlowali my fajnisty kamracki tref we cylu łodpoczynkowym. Skuli tego, co uczystniki, przibytnie byli ze ci roztomajtych strōn Polski, tōż tyż na miyjsce posjyżdżali sie dziepiyro niyskoro na łodwieczerz. Na tela niyskoro, iże tameszny sklep bōł już na fest zawrzity. A żŏdyn snŏs niy pomyślŏł, coby ze sia chlyb zebrać. Nō, uzdali my, co to sie zrobi ło szaroku a pokiel co, rest klapsznitōw dali my naszym babeczkōm, coby niy byli głōdne i beztōż fest – zmiyrzłe. Same pożywiyli my sie... biyrym, bo tego przeca żŏdyn snŏs na isto niy zapōmniŏł. Dŏwnochmy sie już niy widzieli, tōż tyż łozprŏwki przeciōngli sie kajsik niyskoro w noc i ani my sie spodzioli, a sam już szarok i nowy dziyń nastŏł. Jako, iże my sōm „dżyntylmyny” umiyniyli my sie, iże naszym babōm dokludzymy na śnŏdanie friszny chlyb, nō i wypuściyli my sie do wsi. Piwa nōm jesce ździebko łostało, tōż tyż szło nōm sie blank dobrze. Na miyjscu pokŏzało sie, iże tyn sklep łotwiyrajōm dziepiyro za jakosik możno godzina. Uburdalichmy sie, co wrŏcać sie nōm niy werci... doczkōmy. Zicli my sie na bance przed tym składym i czekalichmy... ale niyprzespanŏ noc, te pŏranŏście piw i gorkŏ klara, kerŏ już napoczła blyndować, wszyjsko to do kupy smōgło ci nŏs i przisnyli my sie ździebko na tyj bance. Ło pōł łōsmyj łobudziōł ci nŏs klang klucy – sklep łotwiyrajōm! Ze niyjakōm biydōm zwlykli my sie ze tyj banki i stanyli my gymba w gymba ze Paniczkōm Przedowaczkōm, ftoro razinku syjmowała ze dźwiyrzy srogŏ ocelowŏ sztanga. Paniczka Przedowaczka zmiyrzōła nŏs fachowym weźrokiym, łoświdrzōła nŏs, pokiwała gowōm i łodezwała sie ku nōm: – Niy, niy Panoczki... Jabola jesce niy ma, niy dowiyźli!!! |
|
| Strona 1 z 1 | Strefa czasowa UTC+1godz. |
| Powered by phpBB® Forum Software © phpBB Group https://www.phpbb.com/ |
|